Kasturi Paati In Both DMK & ADMK Promotion Video

“பெத்த புள்ள சோறு போடல, எனக்கு சோறு போட்ட தெய்வம், புரட்சித் தலைவி அம்மா தான்” என்ற அதிமுக விளம்பரம் ஒரு பக்கம் ஒளிபரப்பாக, “ வானத்துல பறக்குறவங்களுக்கு நம்மளுடைய பிரச்னை எப்படி தெரியும்? மக்களைப் பற்றியே கவலைப்படாத ஆட்சி இனி எதுக்குங்க?” என்று திமுக விளம்பரம் மறுபக்கம் ஒளிபரப்பாகிக்கொண்டிருக்கிறது. இதில் ஸ்பெஷல் என்னவென்றால் இந்த இரண்டு விளம்பரங்களிலும் கஸ்தூரி என்ற பாட்டி தான் நடித்திருக்கிறார். இன்றைய தேதியில் இந்தப் பாட்டி பற்றித் தான் ஊரெல்லாம் ஒரே பேச்சு, அந்தப் பாட்டிக்கு என்ன தான் ஆச்சு? பாட்டியிடமே பேசினேன்.

“நானே முழிச்சிட்டு இருக்கேன், இன்னைக்கு வேலைக்குக் கூட போகலை. திமுக விளம்பரத்துல நடிச்சது எனக்கே தெரியாம நடந்துடுச்சி. ஏஜென்ட் விளம்பரம்னு சொல்லி தான் கூட்டிட்டுப் போனாரு, அது திமுக விளம்பரம்னு எனக்கு தெரியாது. அம்மா விளம்பரத்துல மட்டும் தான் தெரிஞ்சி நடிச்சேன்” என்று பயத்துடன் பேசினார் கஸ்தூரி பாட்டி.

முதல்ல அம்மாவோட விளம்பரம் தான் நடிச்சேன். ஒரு வாரத்துக்கு முன்னாடி தான் திமுகவோட விளம்பரம்னு தெரியாமலேயே நடிச்சி கொடுத்துட்டேன், ஆனா அம்மாவுக்கு நடிச்சது வெளியாகிரதுக்கு முன்னாடியே கலைஞருக்காக நடிச்சது டிவில போட்டுட்டாங்க. வீட்டுல வேலை பார்த்துட்டு இருக்கும்போது தான், திமுக விளம்பரத்தை டிவில பார்த்தேன், பார்த்ததுமே அதிர்ச்சியாகிடுச்சி, எனக்கு ரொம்ப பயமாகிடுச்சி. இந்த விளம்பரத்தை நிமிஷத்துக்கு ஒருதடவை டிவில போடுறத பாக்கும் போதெல்லாம் பதட்டமா இருக்கு.

பார்க்குறவங்க எல்லோருமே ஒருமாதிரி பேசுறாங்க, திமுக விளம்பரத்துல கடைசியா “போதும்மா போதும்மா”னு சொல்லுவேன், அதை சின்னப் பசங்க சொல்லி கிண்டல் பண்ணுறாங்க, மனசு ரொம்ப கஷ்டமாகிடுச்சி. அதுனாலயே வெளிய போகமுடியலை. ஆனா மக்களுக்கு இந்த விளம்பரத்துக்கு பின்னாடி என்ன நடந்துதுன்னு தெரியாதுல்ல.

இதுவரை ரெண்டு அதிமுக விளம்பரம் நடிச்சிருக்கேன். ஆனா, திமுக விளம்பரத்துக்குனு ஏஜெண்ட் கூட்டிட்டுப் போனதே தெரியாது. கடைசி வரைக்கும் வேற ஏதோ விளம்பரம்தான்னு நெனச்சேன். கடைசில இப்படியாகிடுச்சி, சொல்லிருந்தா நடிச்சிருக்கவே மாட்டேன், சொல்லாம செஞ்சிட்டாங்க. இப்போ, மீட்டிங்ல பேசுற மாதிரி விளம்பரம் நடிக்கக் கூப்பிடுறாங்க, நான் வரலைன்னு சொல்லிட்டேன்.